У Орховици, у Дому червеного крижа Меркур, 9. юлия почала Лєтна школа Русинох Републики Горватскей. Школа ше отрима у двох ґрупох, од 9. по 16. юлий и од 16. по 23. юлий.
Учасц вежнє коло 150 школярох котри зацикавени за руски язик, преважно з местох дзе жию Руснаци а велька ґрупа того року (коло 30 школярох) приявела ше и з Пишкоревцох.
Виучовац ше будзе мацерински язик, фолклор и музика. Преподаваче за руски язик у першей ґрупи буду Мануела Дудаш, Вера Павлович и Леся Мудри док у другей ґрупи мацерински язик место Мануели Дудаш будзе преподавац Лела Дїтко. За фолклор у обидвох ґрупох задлужени Звонко Костелник а за музику Агнета Тимко.
Од рекреативних змистох, медзи иншим, дзеци маю на росполаганю и базен а двойо волонтере Червеного крижу буду анимировац їх шлєбодни час.
Лєтна школа ше отримує з финанцийну потримовку Министерства просвити и школства Републики Горватскей.
