РАЄВО СЕЛО - У просторе обновеней школи у Райовим Селу, 20. фебруара того року КУД Руснацох Цвелфериї отримало порядну звитну Скупштину Дружтва зоз дньовим шором хтори ше одношел на звит о роботи у прешлим року, план роботи у тим року и рижне.

Предсидатель Дружтва Звонко Грубеня привитал шицких присутних, дал предклад же би ше оформело роботне цело и верификацийна комисия хтора утвердзела кворум. Поднєшени звит о роботи Дружтва, начишлєни активнсци у прешлим року, а тиж так поднєшени и финансийни звит хтори єдногласно прилапени.

Присутних привитала и предсидателька Союзу Дубравка Рашлянин хтора наглашела потребу оживйовня наших Дружтвох и прицагованю младих през шицки аклтивносци же бизме ше на тих просторох затримали и одняли асимилациї. Тайомнїк Союзу и член Совиту за национални меншини Звонко Костелник наглашел же за обставанє Руснацох барз значне отверанє можлївосци порядного ученя руского язика у школи през модел Ц.

Редакторка наших виданьох Вера Павлович гварела же на годзини руского язика можеме упсац нє лєм руски дзеци, пре хторих би ше першенствено рушело зоз отвераньом виборней настави, алє же єст позитивни искуства зоз Вуковару дзе оформени ґрупи и од школярох хтори нє припаднїки рускей националней меншини, а сцу научиц єден язик вецей, цо значи же лєм треба рушиц до реализациї таких планох. Тиж так предложене же би ше нашо културно-уметнїцки дружтва медзисобно вецей сходзели и госцовали єдни при других на литературних стретнуцох и индзей.

Наздаваме ше же тот рок за наших Руснацох у Цвелфериї будзе плодотворни.

Вера Павлович