Дня 19. и 20 септембра 2015. у Старих Янковцох и Петровцох, а у орґанизациї Дружтва »Руснак«, отримана 4. Културна манифестация „Кед голубица лєцела” у чиїх рамикох отримани вецей активносци. Всоботу, у Старих Янковцох отримани перши зашеданя Шветовей ради Русинох/Руснацох/ Лемкох (ШР РРЛ) и Шветового форуму русинскей младежи (ШФРМ) у нових зволаньох. На обидвох зашеданьох участвовала векшина представительох членских орґанизацийох ШР РРЛ. Одсутни були представительох з Польскей та Зєдинєних Америцких Державох и Канади. После покладаня венца на памятнїк, госцох и делеґатох привитал началнїк Општини Стари Янковци Драґан Сударевич и предсидатель Дружтва »Руснак« Мийо Шайтош.
Зоз схадзку ШР РРЛ предшедовал єй нови предсидатель Штефан Лявинец з Мадярскей. Од велїх принєшених, видвоїме два заключеня, а то: же би ше обнавело вимоги ШР за запровадзованє порядних и мастер студийох русинскей фолклористики на Пряшовским универзитету и на Универзитету у Нїтри и же би ше до Уряду Влади Словацкей послала вимога за потримовку организованю младежских кампох у Домаши у тей жеми.
Понеже нова предсидателька Светлана Петрецки з Румуниї источашнє и член ШР РРЛ, початну часц зашеданя ШФРМ водзела його допредсидателька Ивона Гнатко. Окремна увага дата на вирабянє плану и програми роботи у шицких членских орґанизацийох, а отримани и два роботнї – „Народни писнї Панонских Руснацох” и „Народне облєчиво Панонских Руснацох”. На зашеданю ШФРМ з Горватскей були присутни Мирон Гнатко, Боян и Оливера Кошутич, Леона Бурчак, Єлена и Мая Мудри, Мая Рац, Мая Гарди, Кристиян Медєши и Иван Лїкар.
Всоботу вечар у Петровцох отримана културна програма котра по пияти рок ноши назву „Кед голубица лєцела”. Пред програму, у голу Дому култури отворена Фото-вистава етнолоґа Ивана Чижмара зоз Свиднїку, зоз Словацкей, з назву „Русинске народне облєчиво Пряшовского краю”. На початку програми присутних и госцох привитали доначальник Општини Боґдановци Ярослав Медєши, предсидатель Дружтва „Руснак” и подпредсидатель ШР Мийо Шайтош, предсидатель ШР Штефан Лявинец и заступнїк националних меншинох у Соборе Горватскей Велько Кайтази, котри ю и официйно отворел. Програму ище звелїчали петровски парох мр. сц. Владимир Седлак, член Совиту за национални меншини РГ Звонко Костелник, предсидателє рускей жупанийскей, городскей и општинскей ради: Борис Бучко, Лела Дїтко и Владимир Дудаш та предсидатель МО Петровци Томислав Рац.
Попри шпивацкей ґрупи Дружтва »Руснак«, котра отворела програму, у першей часци наступели КУД „Oсиф Костелник»зоз Вуковару, КУД «Яким Гарди» зоз Петровцох, КУД «Яким Ґовля» зоз Миклошевцох, КУД Русинох зоз Осиєку та петровска малженска пара Юлияна и Ивица Рашич. У другей часци, з народнима русинскима писнями свойого краю представели нам ше члени шветового форуму споза гранїци, а то Лаура Фузеирова зоз Свиднїку (Словацка), дзивоцка шпивацка ґрупа зоз Деви (Румуния) и ґрупа »Гурт Фатьови« з Мукачова (Україна). Поета Славко Пап з Руского Керестура (Сербия), пречитал нам свойо стихи. По перши раз вєдно наступели шицки присутни зоз ШФРМ и то зоз рускима народнима писнями »Вжал бим це дзивчатко« и »Ша ми тадзи преходзели«, котри того пополадня научели на музичней роботнї. Културна програма закончела з писню »Многая лїт« котру одшпивали шицки присутни.
Пре обставини з миґрантами и почежкосци на гранїцох з Горватску, трио Ґерек зоз Свиднїку и Фолклорни ансамбл »Рутения« з Братислави одказали участвованє.
Внєдзелю, шицки госци и делеґати споза гранїци були на Служби Божей у Петровцох, а потим нащивели Етноґрафску збирку Руснацох. Друженє зоз госцами наставело ше у просториї »Руснака« и у »Ловарским доме« у Старих Янковцох.
Тогорочна КМ »Кед голубица лєцела« отримана под покровительством Совиту за национални меншини РГ. Сопокровителє були саборски заступнїк за национални меншини Велько Кайтази, Општини Боґдановци и Стари Янковци, Рада рускей националней меншини городу Вуковару и предстванїк рускей националней меншини Городу Заґребу. Цалу манифестацию провадзела ТВ екипа Земплин зоз Словацкей.
