ОСИЄК - У орґанизациї КУД-а Руснацох Осиєк, 14. октобра у просторийох Дружтва, отримани Мемориял «Владимир Тимко» котри бул подзелєни на два часци. У першей часци отримани литературни вечар а у другей змаганє у столним тенису.

Предсидателька КУД Руснацох Осиєк, Татяна Миклош, з пригоднима словами присутних здогадла на доприношенє Владимира Тимка рускей култури и обстойносци Руснацох, як у Осиєку, так и у Горватскей а потим члени Дружтва, Гелена Тимко, Блаженка Будимчич, Татяна Миклош и Томислав Мишир пречитали виривки з идилского венца «З мойого валала» Гавриїла Костельника.

У другей часци Меморияла отримани турнир у столним тенису. Бавело дзешец бавячох: Ян Мишир, Томислав Мишир, Зденко Сивч, Мирослав Мудри, Татяна и Гелена Тимко (дзивки покойного Владимира), Владимир Еделински, Ромко Гаргай, Мирослав Дїтко и Йоаким Голик. Перше место освоєл Йоаким Голик, друге Ромко Гаргай а треца була Татяна Тимко. Судзели Яким Голик и Мирослав Мудри а записнїк о цеку змаганя водзела Агнетка Балатинац. Дружтво пририхтало скромни награди побиднїком котри уручела Славица Тимко, ґдовица покойного Владимира.

По законченим змаганю, присутни бавяче и навияче, иншак шицки члени КУД-а Руснацох Осиєк, погосцели ше з традицийну пасулю котру за тот Мемориял уж роками рихтаю Зденко и Манда Сивч.

Агнетка Балатинац

Фото: А. Балатинац

  1. З лїва на право: Ромко Гаргай (2. место), Татяна Тимко (3. место) и Йоаким Голик (1. место)
  2. Навияче и бавяче, члени КУД Руснацох Осиєк
  3. Литературна часц, стихи Г. Костельника читаю Гелена Тимко, Блаженка Будимчич, Татяна Миклош и Томислав Мишир