ВУКОВАР - В нєдзелю, 08. марца у простирийох дружтва “Осиф Костекник” у Вуковаре отримана звитна схадзка. Перше усвоєни дньови шор, потим вибране роботне предсидательство, записнїчар, верификовна комисия и подписовазелє записнїка. До роботного предсидательства вибрани Владо Русин, предсидатель и Звонимир Барна, член, за записнїчара Любица Гаргай. До верификационей комисиї вибрани Зденко Бурчак, Славко Рамач и Мирко Дорокази. За подписовательох записнїку вибрани Звонимир Барна и Мария Русин.
Верификациона комисия заключела же єст кворум и дала дошлєбодзенє жє би ше Скупштина отримала. Скорей роботи Скупштини шицким присутним прегварела предсидателька Союзу Дубравка Рашлянин та бешедовала о Союзовей роботи и о тим як далєй. Тиж так спомла виберанки на хторих ше будзе кандидовац за заступнїка у Соборе и поволала присутних же би єй дали потримовку.
Звит о роботи дружтва за 2014. рок поднєсол предсидатель дружтва Владо Русин. Финасийни звит поднєсол касир Звонимир Барна. Член Надпатрацого одбору Славко Рамач тиж пондєсол их звит. О спомнутих звитох нє було нїякей дискусиї.
Почим у Републики Горватскей принєшени нови закон о Здруженьох требало Статут дружтва зоз нїм ускладзиц у коєяких дробнїцох, а найважнєйше же ше требало до ньго увесц такволаного ликвидатора хтори би у случаю гашеня дружтва одробел шицко потребне. Записане же би тота особа бул остатнї предсидатель.
Шицки звити прилапени єдногласно, як и пременки у Статуту.
Предисдатель Владо Русин бешедовал о планох заз тот рок.
По законченей Скупштини отримане єдно литературно- музичне пополанє, а з нагоди медзинародного Дня женох хторе обдумала литературна секция. Читани стихи руских поетох и поетесох, а о женох так як их вони видза, як мацер, бабу, нину або прешлу любов. Модератор була Любица Гаргай хтора тиж попри Вери Павлович и Звонимира Барни и писнї читала. У музичней часци шпивали Мария Русин и Кристиян Миклош, а на гармоникох их провадзели Ренато Миклош и Витомир Гарди.