ПЕТРОВЦИ - У просторийох Општинскей сали за схадки, 07. фебруара того року отримана порядова звитна Скуштина КУД «Яким Гарди» Петровци. На самим початку предсидатель дружтва Желько Костелник привитал шицких и предложел роботне предсидательство котре Скупштина прилапела. Звит о роботи поднєсол секретар дружтва Владимир Дудаш, котри наглашел же дружтво зоз своїма секциями витворело 48 наступи у жеми и иножемстве. Звичайно же би ше таки резултати нє могли витвориц без потримовки Совиту за национални меншини, Союзу Русинох Републики Горватскей, Општини Боґдановци, Ради рускей националней меншини Општини Боґдановци, як и Месного одбору Петровци и других. На наступи ше путовало и зоз трома дружтвами же би ше ушпоровали средства, а виполнєло програми. Шицки тоти госцованя требало потримац и оправдац – гварел у своїм звиту Томислав Рац, касир дружтва, котри наглашел же у прешлим року потрошене понад 76. 000 куни. Михайло Голик, предсидатель Надпатрацого одбору, упознал шицких присутних о финансийних роботох котри ше запровадзали у складзе зоз законами и финансийнима обовязками. Одбор контролує дружтво през цали рок и барз є задовольни зоз роботу предсидательства и шицких секцийох. Началнїк Општини Юрай Михайлович похвалєл роботу дружтва, котре того року означує 65. рочнїцу и пожадал успиху у дальшей роботи Дружтва. Андрия Кризманич, спред Општинскей Ради Општини Боґдановци, наглашел же Општина и нєдалєй будзе потримовац роботу Дружтва, а поготов кед ше видза таки успишни резултати. Звонко Костелник, спред Совиту и Союзу Русинох РГ, привитал шицких присутних и подзековал аматером на нєсебичней роботи и котри на своїх плєцох винєсли найвекшу терху резултатох у прешлим року. После кратшей розправи прилапени звити и план роботи за 2015. рок, а предсидатель подзековал шицким и поволал их на нєформалну бешеду зоз цеплима напитками и слаткима лакотками.