ОСИЄК - У орґанизациї городскей и свеучилишней библиотеки Осиєк, у шветочней сали у Доме горватскей войски, 20. фебруара 2015. року, отримана закончуюца манифестация означованя Дня мацеринского язику у Осиєку под назву «Фестивал язику».
Наступело 12 дружтва котри през писню, рецитацию, драмску сличку лєбо на иншаки способ представели свой мацерински язик. На нєвельким просторе у голу пред шветочну салу, було поскладане даскельо штанди на котрих национални меншини представели свой язик, писмо, традицийни єдла и друковани виданя як и часточку националноги скарбу котри их означує як специфичну националну меншину.
КУД-о Руснацох Осиєк представел ше зоз рецитацию Агнетки Балатаница «Сина Руснака» , котру интерпретовала Мануела Дудаш, та з двома шпиванками: «Желєнє жито» и «У градочки шалата» котри з провадзеньом тамбуровей оркестри одшпивал хор КУД-а Руснацох Осиєк.
Етно секция на нєвельким штанду котри им бул на росполаганю, представела традицийни руски єдла, нашо писмо, друковани виданя та колаж о историї Руснацох, як и фотоґрафиї з роботи КУД-а Руснацох Осиєк. Мушиме надпомнуц же було коло 300 людзох а простор за викладанє премали же би ше нащивителє могли поблїжей и студиознєйше поинформовац о даєдней националней меншини, алє тиж мушиме надпомнуц же «Фестивал язику» каждого року на висшим уровню а то нагода же би ше и Руснаци указали.
                                                                                                                                 Агнетка Балатинац
                                                                                                                                  Фото:А.Балатинац
1. КУД-о Руснацох Осиєк на «Фестивалу язику» у Осиєку