ВУКОВАР - Ґрупа гражданох, вуковарчаньох предводзена зоз паном Ваньом Видакович порушала инициятиву под назву “Чекам це на Вуковарским корзу”, а з цильом же би ше ожило вуковарски корзо. Направели ище у априлу мешацу оглашку-поволанку, а oбявели на Фейсбуку и поволали людзох же би ше пришли прешейтац, нїч окремне од того нє обчековац, єдноставно буц ту, ту на Вуковарским корзу.
Тоту инициятиву гражданох, хтори жадаю ожиц дружтвени живот городу Вуковару и врациц му часц старей шветлосци, препознали як барз добру Город Вуковар и Туристична заєднїца городу Вуковару. Дали єй потримовку и вона преросла до трафяна у городу хторе ма винїмно традиционалну, дружтвену и репрезентативну вредносц за город.
Учасц у тей приповедки достало и КУД “Осиф Костелник” зоз Вуковару. Було то на 6. стретнуцу на корзу, 25. юлия. З тей нагоди кретивна секция виложела свойо виробки. Члени дружтва барз одушевени зоз тим збуваньом и обецали присц и други раз та ше представиц и зоз другима змистами як цо наприклад национална кухня и подобне. Друженє на вуковарским Корзу тирва од 19.00 по 21.00 годзину кажду другу соботу.
А ево цо вас обчекує кед же ше надумаце всоботу предвечаром прешейтац през центер Вуковару. Ту сце годни найсц квалитетни вина зоз грозна и чарнїцох, природне мидло и козметику, уникатни древени прикраски, рижни народни ручни роботи, подобових уметнїкох, гудацох, конї и кочи на хторих ше можеце вожиц и вельо иншого, а шицко зоз Вуковару.
Идуце стретнуце на Вуковарским корзу будзе 08. авґуста 2015. на 19.00 годзин, а кед же придзеце и скорей нє придзеце вчас.