ПЕТРОВЦИ - На перши дзень Крачуна, 25. децембра на 19 годзин, у сали Соколанa у Петровцох отримана Крачунска програма под назву „Крачунска програма на дарунок Петровчаньом“. Наисце и бул прави дарунок. Велї участвовали, а труд було видно.

Програма була подзелєна на два часци. З оглядом же ше традицийно у тим рочним чаше пиє варене вино, после першей часци ушлїдзела кратка пауза дзе ше нащивителє и учашнїки могли окрипиц зоз вареним вином и медовнїками. Ношителє програми були грекокатолїцка парохия Петровци и КУД „Яким Гарди“ Петровци, а Месни одбор и винария „Бурчак“ подуперали програму.

Крачунски писнї и коляди радосно одшпивали и одрецитовали школяре ПШ „Петровци“. З краснима гласами, и жени котри шпиваю у церкви, украшели програму. Нащивителє мали нагоду видзиц и малу часц медзипарохиялней програми „Крачун 2015“ котру рихтаю красни гласи. Крачунску програму збогацели и три дружтва. Весело зашпивала Хлопска шпивацка ґрупа КУД „Яким Гарди“ Петровци, Женска шпивацка ґрупа КУД „Яким Говля“ Миклошевци и члени Дружтва „Руснак“ Петровци.