ВУКОВАР - И того року у Републики Горватскей отримана манифестация Ноц кнїжки, а то попровадзене зоз 1000 трафянями, на 400 локацийох, у 180 городох и местох и у 21 гарешту. Єден зоз городох того 23. априла 2015. року бул и город Вуковар. Ноц кнїжки у Вуковаре отримани у Городскей библиотеки на Площи Републики Горватскей 1 зоз вецей змистами. За нас найцикавши гевтот змист хтори почал на 18.00 годзин на оддзелєню за одроснутих под назву “Людзе хтори твора город”.
Городска библиотека Вуковар зоз штирома городскима здруженями направела дакус нєзвичайну програму. Идея рушела зоз Городскей библиотеки, а на поволанку ше одволали Здруженє Мадярох городу Вуковару, Здруженє Нємцох и Австриянцох городу Вуковару, Українске културно-просвитне дружтво “Иван Франко” и нашо Културне-уметнїцке дружтво “Осиф Костелник”.
Културне-уметнїцке дружтво “Осиф Костелник” у сотруднїцтве зоз Союзом Републики Горватскей представели саме Дружтво як и особу Осифа Костелника, а през кнїжку Осифовей дзивки Блаженки Хорват “Мой оцец Осиф Костелник”. Реферат порихтала и пречитала професорка Вера Павлович. Слайди фотоґрафийох хтори ше под час бешеди зменьовали позберал и порихтал професор Звонко Костелник. Писню Осифа Костелника “Родими край” пречитала поетеса Любица Гаргай.
По законченей програми шицки озберани ше остали дружиц коло заєднїцкого стола хтори порихтали учашнїки. За нашим столом ту були райтеши зоз бундаву и яблуками, на квасу зоз маком и орехами и бухти цо приготовели вредни руки Младенки Русин и Наталиї Барна. Тиж так на тканих хлєбовкох и коло вишиваних ручнїкох у склєняней витрини були виложени нашо руски виданя. У публики було и красне число Руснацох предводзене зоз предсидательом нашого дружтва Владом Русином.