МИКЛОШЕВЦИ - У Миклошевцох 10. новембра на грекокатолїцким теметове святочно отворени памятнїк жертвом Отечественей войни хтори погинули од 1991. по 1993. рок. Зоз почитованьом присутни ше могли здогаднуц Миклошевчаньох, похованих у масовней крипти, а медзи нїми: Михал Голик, Вероника Голик, Юлин Голик, Микола Шимко, Марта Страценски, Петро Страценски.
Святочносц отвераня нащивели и зоз пригодними словами ґу присутним ше обрацели начальнїк општини Томповци Томислав Паненич, жупан вуковарско-сримски Божо Ґалич, висланїк Сабору Дамир Римац, представнїк кабинету предсидательки РГ Ґоран Ґрошнїч, министер бранительох Предраґ Матич.
Памятнїк отворели Данил Страценски, син покойних Марти и Петра, и министер бранительох Предраґ Матич. Далєй шлїдзела заєднїцка молитва хтору предводзели месни парох о. Яким Симунович, петровски парох о. Владимир Седлак, висланїк войного ординария у РГ войни капелан фра. Мато Винцетич и висланїк Дяковацко-осиєцкей надбискупиї, парох и декан вуковарски о. Павао Коларевич. По молитви венци на пямятнїк положели висланства – предсидательки РГ, Горватского собору, Влади РГ, Вуковарско-сримскей жупаниї, здруженьох з Отeчественей войни и општини Томповци.
У програми отвераня споменика гимну Горватскей и пригодну шпиванку «О жеми моя» одшпивала Блаженка Тарґуш, мецосопран Горватского народного театру Осиєк, док здружени хох културно-уметнїцких дружтвох зоз Миклошевцох и Петровцох одшпивал святочну шпиванку «Браца Русини». Програма була преплєцена зоз стихами з кнїжки писньох «Моя рика слизох» авторки зоз Берки Жельки Митрович Юрич, а пречитана и пригодна писня миклошевскей писательки Агнети Бучко Папгаргаї «Миклошевска голубица».
Леся Мудри
