ШИД - На поволанку Културно-просвитного дружтва „Дюра Киш” зоз Шиду, КУД „Яким Гарди” зоз Петровцох 13. децембра госцовал зоз фолклорним ансамблом и хлопску шпивацку ґрупу. Шидянскей публики петровски ше аматере представели зоз пейцома танцами у трох блокох, у руским, буковинским и блоку Централней України, а док ше танцоше преблєкали, хор презентовал нашо руски писнї. У преполней сали патраче мали нагоду видзиц наших аматерох зоз Горватскей и наградзиц их зоз велькима аплаузами. Окрем Петровчаньох, госцовала и шпивацка ґрупа КПД „Иван Котляревски” з Бикичу. Домашнї ше представели зоз наймладшима танєчнїками, потим наступели младша и старша шпивацка ґрупа, оркестер дружтва, вокални солисти, а найстарша ґрупа танцошох одтанцовала «Руски народни танци». После вецей як двогодзиновей програми, шицки учашнїки одшпивали „На многая лїта”, а потим ше предлужело зоз друженьом и забаву до позно вноци.