ПЕТРОВЦИ - У просторийох Општинскей сали за схадзки 14. фебруара того року отримана порядова звитна Скупштина КУД „Яким Гарди“ Петровци. На самим початку шицких присутних привитал предсидатель Дружтва Желько Костелник и предложел роботне предсидательство, котре Скупштина прилапела. Звит о роботи поднєсол секретар Дружтва Владимир Дудаш, котри наглашел же Дружтво зоз своїма секциями витворело 47 наступи у жеми и иножемстве. Звичайно же би ше таки резултати нє могло посцигнуц без потримовки Совиту за национални меншини, Союзу Русинох Републики Горватскей, Општини Боґдановци, Ради рускей националней меншини Општини Боґдановци, як и Месного одбору Петровци и других. Шицки тоти госцованя требало потримац и оправдац - гварел у своїм звиту Томислав Рац касир Дружтва, котри наглашел же у прешлим року потрошене понад осемдзешат и два тисячи куни. Предсидатель Надпатраюцого одбору Михайло Голик упознал шицких присутних о финансийних роботох котри ше запровадзали у складзе зоз законами и финансийнима обовязками. Одбор контролує Дружтво през цали рок и барз є задовольни зоз роботу предсидательства и шицких секцийох. Заменїк началнїка Марийо Павлович похвалєл роботу Дружтва и пожадал успиху у його дальшей роботи. Андрия Кризманич спред Општинскей Ради Општини Боґдановци наглашел же Општина и далєй будзе потримовац роботу Дружтва, а поготов кед ше видза таки успишни резултати. Предсидателька Союзу Русинох Републики Горватскей Дубравка Рашлянин привитала шицких присутних и надпомла же така робота нашого найвекшого Дружтва за приклад шицким, а за наступни период кед означуєме 185 роки од приселєня Руснацох до Петровцох и Горватскей, 180. рочнїцу петровскей парохиї и 45 роки нашого часопису Нова думка, Дружтво будзе мац найвецей роботи коло орґанизованя рочнїцох. Звонко Костелник спред Совиту за национални меншини РГ привитал шицки присутних и подзековал аматером на нєсебичней роботи бо вони на своїх плєцох винєсли найвекшу терху резултатох у прешлим року. Петро Киш спред Огньогасного дружтва Петровци привитал шицких нащивительох и госцох, и пожадал успишну роботу и у наступним року. После кратшей розправи прилапени звити и план роботи за 2016. рок и предсидатель шицким подзековал и поволал их на нєформални бешеди коло цеплих напиткох и сладких лакоткох.