ОСИЄК - Всоботу, 28. марца 2015. року у центру Осиєку, у орґанизациї городу Осиєку, отримана уж традицийна манифестация "Шарани вайца у фарбох городу". Першираз того року нє отримани Квитни корзо на котрим скорейших рокох участвовали шицки оводарци з Осиєку и школяре нїжших класох основних школох. Хвиля була барз нєвигодна за таку файту манифестациї. Дул моцни витор (на хвильки до 60 км на годзину) та вельо того «лєцело» зоз штандох а було и досц жимно.
"Шарани вайца у фарбох городу" манифестация котра ше уж роками отримує всоботу пред Квитну нєдзелю а наявює приход Велькей ноци и яри.
На штандох котри заберали цалу площу у центру городу участвовали 83 рижни здруженя, медзи котрима и КУД-o Руснацох з Осиєку, котре представело Велькопосни и Вельконоцни єдла и писанки котри направели членїци Ликовней-етно секциї.
Источащнє, на бини ше зменьовали наступи културно уметнїцких дружтвох . КУД-o Руснацох Осиєк до госцох поволало подросток КУД-a "Яким Ґарди" з Петровцох котри на централней бини одтанцовали «Танєц з калапом» у кореоґрафиї Звонка Костелника.
Окремна комисия каждого року преглашує найкрасше ушорени штанд и найкрасши писанки. Того року здруженє «Шушка» достало награду за найкрасши штанд а за найкрасши писанки преглашени писанки Шокецкей ґрани.
После успишнного наступу, Представнїца рускей националней меншини ОБЖ, Агнетка Балатинац, одведла подросток КУД-a "Яким Ґарди" з Петровцох до, дзецом найцикавшиго ресторану, Мек Доналдсу, дзе ше почасцели з єдлом и пицом а достали и кажде по бависко.
Вецей слики можеце опатриц на фейс буку rusini.hr
Агнетка Балатинац
