ОСИЄК - Стретнуце хорох и шпивацких ґрупох Руснацох Републики Горватскей, 16. Дравски габи, хторе ше звичайно отримує перши викенд у децембру, того року, пре епидемийни мири стожеру цивилней охрани РГ, хтори праве у тот час забранєли аматерски манифестациї, отримани на фейс бук ґрупи KUD Rusina Osijek, а подзелєни на фейсбук боку rusini.hr, як и на велїх приватних фейсбук профилох.
КУД Руснацох Осиєк, ше опредзелєл за тоту файту отримованя манифестацї, насампредз же би ше континуитет наставел а понеже векшина збуваньох у 2020. року идзе прейґ дружтвених мрежох, КУД Руснацох Осиєк поволал на сотруднїцство шицки руски дружтва з Горватскей хтори пестую хорске шпиванє, же би вжали учасц на тих виртуалних Дравских габох, хтори ше отримали on-line 5. новембра 2020.року
Ище єдно препреченє ше створело пред орґанизацийним одбором Дравских габох а то же забранєне отримованє хорских пробох и зберанє хорских ансамблох у Дружтвох. На тот способ онєможлївене же би ше Дравски габи отримовали директно зоз каждого дружтва алє ше було примушене класц стари знїмки и пошоровац их на даяки способ до єдней манифестациї.
Тоту роботу на себе превжала Агнетка Балатинац а пошвидко ше могло опатриц и обєдинєни материял на you tube каналу rusinihr а подзелєни на уж спомнутих фейсбук ґрупох и бокох.
Звичайни Дравски габи вше угосца и даєдно дружтво з Войводини як и припаднїкох других националних меншинох з Осиєку, найчастейше то Словаци лєбо Македонци. Понеже тераз шицко ишло виртуално, поволани були и Словаци и Македонци а як госцуюце дружтво з Войводини була поволана хлопска шпивацка ґрупа Дома култури з Руского Керестура.
Од руских дружтвох з Горватскей наступели: КУД «Яким Гарди» з Петровцох, КУД «Яким Ґовля» з Миклошевцох, КД Руснацох Винковци, Руснак, дружтво Руснацох у РГ и домашнє, КУД Руснацох Осиєк.
Видео винчованку за 16. Дравски габи послали Ґоран Иванович, дожупан и предсидатель Совиту за национални меншини Осиєцко-бараньскей жупанї, Жана Ґамош, заменїца городоначалнїка ґороду Осиєку, Дубравка Рашлянин, предсидателька Союзу Русинох РГ, Агнетка Балатинац, Предтавнїца рускей националней меншини Осиєцко-бараньскей жупаниї а у текстуалней форми и Предтавнїца македонскей нм городу Осиєку, Яґода Цветичани. Дравски габи отворел, односно виртуалних учашнїкох и патрачох привитал, предсидатель КУД Руснацох Осиєк, Оґнєн Здравкович.
През вецей як 2000 анґажмани на фейсбуку, мож заключиц же у тих ковид часох, людзе хасную доступни дружтвени мрежи же би остали у контакну зоз своїм народом, свою културу и же би ше повязали у предлуженю аматерских активносц, за тераз як виртуални патраче лєбо учашнїки а пошвидко, наздаваме ше стретнуцом «уживо».
Агнетка Балатинац
фотоґрафиї/Screenshot Агнетка Балатинац
