ВУКОВАР - Внєдзелю, 28. фебруара того року на 15 годзин, отримана рочна звитна Скупштина КУД “Осиф Костелник” у Вуковаре. Скупштину отворел предсидатель Дружтва, Владо Русин. На окемни способ привитал Звонка Костелника, члена Совиту за национални меншини Републики Горватскей и Дубравку Рашлянин, предсидательку Союзу Русинох Републики Горватскей. Потим вибране роботне предсидательство, верификацийна комисия, записнїчар и подписователє записнїку. До роботного предсидательства вибрани Владо Русин, предсидатель, а за членох Зденко Бурчак и Звонимир Барна. До верификацийней комисиї вибрани Мирко Дорокази и Йоаким Дудаш. За записнїчара Любица Гаргай, а за подписовательох записнїку вибрани Мария Закалюк и Татяна Алерич.
Верификацийна комисия заключела же єст кворум и дала дошлєбодзенє жє би ше Скупштина отримала.
Звит о роботи Дружтва за 2015. рок поднєсол Владо Русин, предсидатель Дружтва. Вон бешедовал о роботи Дружтва у прешлим периодзе. Дружтво робело добре, шорово ше сходзели шицки секциї хтори у Дружтве исную. У прешлим року наступало ше на 27 заводи. Були то наступи ту у наших местох: Вуковаре, Петровцох, Миклошевцох, Осиєку, алє и далєй. Окреме наглашени успишни наступи у Риєки, Мариї Бистрици и Заґребе. Тиж так, Дружтво штварти раз успишно орґанизовало дзецинску манифестацию “Перши аплауз”.
Финансийни звит поднєсол касир Звонимир Барна. Вон присутних подробно поинформовал о приходох и розходох Дружтва. У прешлим року, як и потераз, найвецей пенєжу ше потрошело на путни трошки, т. є. на плаценє автобусох. Предсидатель Владо Русин надополнєл же обидва звити на час придани до Совиту за национални меншини РГ, Фини и два до Городу Вуковару.
Член Надпатраюцого одбору Йоаким Дудаш тиж пондєсол їх звит, зоз заключеньом же нє було нєправилносци у роботи Дружтва.
О спомнутих звитох нє було нїякей дискусиї, анї пригварки, та шицки звити єдногласно прилапени.
Предисдатель Владо Русин бешедовал о планох за тот рок. Наглашел же ше и надалєй будземе старац наступиц вшадзи дзе ше нас повола. Уж почали прегварки за наступ у Макарскей. Тиж так ше у тим року Дружтво будзе вецей намагац до роботи уключиц цо вецей дзеци.
Под точку рижне за слово ше явел Янко Колбас, та ше опитал чи би ше того року могло до госцох поволац дружтво зоз места Криж, дзе нашо Дружтво скорей даскельо роки наступало, як и прецо ше нє наступело на Дню Руснацох РГ. Предсидатель Русин одвитовал же нїяки нє проблем поволац КУД зоз Крижу. Тиж потолковал же ше на Дню Руснацох нє наступело прето же вецей як половка членох Дружтва була одсутна, та ше нє мало з ким наступиц.
Потим слово вжала предсидателька Союзу, Дубравка Рашлянин и повинчовала членом Дружтва на їх роботи, пожадала им вельо успиху у тим року, а шицким другим вельо, вельо любови.
